بعد ما عرفنا مصادر الدخل في المطارات و كيف المطارات تكسب فلوس ، ممكن نسأل أنفسنا كيف المطارات تحدد أسعارها أصلاً؟ يعني مثلاً كيف تحدد إدارة المطار السعر اللي تدفعه شركات الطيران مقابل الخدمات مثل استخدام المدرج أو خدمات تخليص المسافرين أو غيره.
بكل إختصار في 3 طرق أساسية معتمدة عالمياً لتسعير خدمات المطارات. وممكن تختلف الطريقة المتبعه حسب سياية البلد نفسه او سياسة مالك/مشغل المطار. وهذه الطرق الثلاث هي:
- النموذج الأحادي (Single till)
- النموذج المزدوج (Dual till)
- النموذج الهجين (Hybrid till)
في هذا المقال ، بشرح لكم كل نموذج بطريقة سلسة ومختصرة بحيث توصل الفكرة بسهولة. وبنذكر بعض الأمثله اللي توضح طريقة تطبيق هذه الطرق في المطارات حول العالم و كيف المطارات تحدد أسعارها.
ايش هو تسعير خدمات المطارات؟
بطبيعة الحال المطارات تقدم خدمات لمستخدمين المطار سواء شركات الطيران أو المسافرين أو اصحاب المحلات التجارية. هذه الخدمات مثل: استخدام المدارج والممرات ، تخليص المسافرين ، تخليص الأمتعة ، الخدمات الامنية ، الخدمات التجارية (محلات، سوق حرة، مواقف، ….) ، خدمات الملاحة الجوية، خدمات الطوارئ، وغيره
وتشغيل هذه المرافق بتوفير هذه الخدمات يحتاج استثمار ضخم من المطارات. بالتالي المطارات تفرض رسوم لإستخدام هذه المرافق لتغطية بعض التكاليف على المطار واستمرارية تشغيل المطار.
وهنا يجي دور نظام التسعير او طريقة التسعير اللي يتبعها المطار لحساب هذه الرسوم. وممكن تكون واحدة من الطرق الثلاث التالية:
الطريقة الأولى: النموذج الأحادي Single till
في هذا النموذج ، يتم احتساب كل ايرادات المطار (سواء المتعلقة بالعمليات الجوية أو الغير جوية). يعني بكل بساطه لما ابدأ بتحديد السعر آخذ بعين الإعتبار ايراداتي كلها بشكل كامل. وبعدين استخدم الإيرادات من العمليات الغير جوية (اللي من المحلات مثلا) لتخفيض السعر النهائي على شركات الطيران.
وهذا النموذج هو المفضل عند شركات الطيران لأنهم يستفيدوا من السعر النهائي المعدل بعد إظهار الإيرادات الغير المتعلقة بالطيران (الغير جوية). يعني بإختصار تخفف السعر علي لانك غطيت بعض التكلفة عليك بأرباحك الغير الجوية.
مثال تطبيقي:
هيئة المطارات البريطانية اللي كانت المشغله لمطارات مثل هيثرو وجاتويك في لندن ، استخدمت هذا النموذج لفترة طويلة في تحديد اسعار المطار. وساعد هالشي في تخفيض الأسعار على شركات الطيران بدعم الإيرادات الغير جوية.
الطريقة الثانية: النموذج المزدوج Dual till
في هذا النموذج، يتم الفصل بين الإيرادات الجوية والغير الجوية. يعني شركات الطيران تتحمل التكاليف الكاملة لإستخدام خدمات المطار بدون الإستفادة من إيرادات المطار التجارية من المحلات وغيره (الغير الجوية).
ف لما ابدأ بتحديد السعر اخذ بعين الاعتبار (الإيرادات الجوية) لأسعار (الخدمات الجوية) ، و (الإيرادات الغير جوية) لأسعار (الخدمات الغير جوية). وبطبيعة الحال هذا النموذج مفضل عند المطارات لأنهم يستفيدوا من فصل كل خدمة لوحدها.
مثال تطبيقي:
مطار شيفول في أمستردام يطبق النموذج المزدوج في تحديد أسعار المطار. الأسعار نوعاً ما تكون أعلى لشركات الطيران مقارنة بالنموذج الأحادي ولكن المطار يستفيد أكثر من التكاليف المستقلة والمنفصلة.
الطريقة الثالثة: النموذج الهجين Hybrid till
هذا النموذج الهجين هو خليط بين النموذجين الأحادي والمزدوج. يعني آخذ بعين الإعتبار جزء من الإيرادات الغير الجوية وجزء من الإيرادات الجوية في تحديد الأسعار لمستخدمي المطار.
بشكل اوضح، لما أبدأ تحديد الأسعار (للخدمات الجوية) استخدم جزء فقط من (الإيرادات الغير الجوية) عشان اخفض تكاليف الخدمات الجوية على شركات الطيران. فيكون في نوع من المرونة في التسعير.
تطبيق آخر مثلاً لما أحدد رسوم الهبوط اتبع النموذج الأحادي ، ولتحديد رسوم مبنى المطار اتبع النموذج المزدوج.
مثال تطبيقي:
الكثير من المطارات الدولية مثل مطار دالاس فورت وورث في أمريكا يعتمد أسلوب النموذج الهجين. يعتمد المطار على جزء من عوائد المحلات والمواقف لتخفيف الرسوم على شركات الطيران بدون التضحية بكامل الأرباح التجارية (الغير جوية)
أي نموذج هو الأفضل ؟
مافي إجابة محددة لأن كل نموذج يخدمك حسب أهدافك:
- بعض المطارات تختار النموذج الأحادي لجذب شركات الطيران وزيادة الحركة الجوية.
- بعض المطارات تختار النموذج المزدوج لتوجيه الأرباح التجاريه للإستثمار وشفافية أكثر للربح.
- بعض المطارات تختار النموذج الهجين كخيار متزن يجمع بين الإستدامة والربحية.
فـ قرار إختيار أي نموذج يعتمد حسب أهدافك في مطارك وأمور أخرى مثل : السياسة الإقتصادية للدولة، غاية تنموية أو ربحية، وطبيعة السوق المحلي والمنافسة.
أسعار المطارات
الحين بعطيكم بعض الأمثلة الحسابية لبعض رسوم المطارات وكيف المطارات تحدد أسعارها ببعض الحسابات ، وايش اللي ممكن يؤخذ بعين الإعتبار لتحديد السعر في العملية الحسابية. طبعاً هذة أمثلة بشكل عام لأن مثل ما ذكرنا كل مطار وله إدارته وطريقته الخاصة لهذه الأمور.
- رسوم الهبوط = (تكاليف المدرج + هامش الربح) ÷ الوزن الأقصى لإقلاع الطائرة MTOW
تكاليف المدرج : أي تكاليف لتشغيل المدرج سواء تكاليف تخطيط المدرج أو الإنارة أو اللوحات أو أجهزة الهبوط والملاحه أو خدمات الأمن والإطفاء أو الصيانة وغيره. والشي الأساسي هو حساب الرسوم على اساس الوزن مثل ما هو موضح.
ملاحظه: بعض المطارات تكون الحسبة على أساس عدد الرحلات بدل وزن الطائرة.
- رسوم الشحن الجوي= (التكاليف + هامش الربح) ÷ مجموع الأطنان المتوقعة
مجموع الأطنان المتوقعه يعني كمية الشحنات المتوقع نقلها. ممكن تعرفها مقارنة بالسنة الماضية مثلاً.
- رسوم وقوف الطائرات = تكاليف خدمات الوقوف ÷ عدد الطائرات المتوقع
ويعتمد بالعادة على حجم الطائرة ومدة وقوف الطائرة
- رسوم تخليص المسافرين = تكاليف خدمات المسافرين ÷ مجموع عدد المسافرين
هذه الرسوم بالعادة تعرف بالـPDF أو UDF. وبالعادة يتم إدخالها في سعر التذكرة من شركات الطيران.
الأسئلة الشائعة:
لماذا تختار بعض المطارات النموذج المزدوج؟
لأنها تفضل أن كل خدمة تكون مستقلة بتسعيرها. شفافية أكثر لجذب المستثمرين
كيف المطارات تختار أسعارها؟
حسب اهدافها لإدارة المطار، تختار واحد من النماذج الثلاثة الرئيسية الأحادي ، المزدوج، أو الهجين.
هل يمكن تغيير النموذج مع الوقت؟
نعم ممكن. المطار يقدر يغير النموذج حسب تغيير اولوياته او اهدافه مع الوقت
كيف المطارات تحدد أسعارها؟ الخاتمة
تسعير المطارات مو طريقة عشوائية أو فقط قرار إداري .. ولكن يعكس رؤية المطار وطريقة عمله بشكل عام لأنه عامل أساسي في تنمية المطار أو توسعه سواء بالإستثمار أو غيره.
واللي مهتم أكثر بموضوع كيف المطارات تحدد أسعارها .. ملف 9082 من الآيكاو منظمة الطيران المدني العالمية فيه تفاصيل عميقة لأساسيات تحديد الأسعار في المطارات. تقدروا تطلعوا عليه إذا كنتوا مهتمين.
المرة الجاية لما تمروا في المطار وتشوفوا المحلات الراقية والخدمات المتنوعه تذكروا انها كلها ضمن الحسابات الدقيقة لتحديد أسعار المطارات. والسؤال لكم ، إذا عندكم مطار .. أي نموذج من الثلاثة راح تختاروا؟