طيران جلوبال يصدم الجميع بطائرة جديدة ثانية بعد طائرتهم الـA380 الوحيدة. الطائرة الجديدة في الأسطول مو جديدة الصنع وعمرها تجاوز الـ25 سنة.
طيران جلوبال ( اللي على اساس يشغلو طائرات A380 بين اوروبا وامريكا) تحول بنموذج عمله فجأه وجابوا هذه الطائرة من نوع ايرباص A340 مستأجرة من طيران هاي فلاي المالطي ، نفس الطيران اللي شغل لهم أول رحلة على الـA380.
الطائرة بتسجيل 9H-SUN خرجت فجأه بشعار طيران جلوبال عليها ولكن بألوانها المعتادة (مثل ما هو واضح في الصورة أدناه) . يعني اللون الأزرق اللي في الصورة مو من هوية طيران جلوبال. فقط اضافوا الشعار !!
هذه الطائرة تستخدمها هاي فلاي في رحلات مستأجره معتاده في جدولها. وهي نفس الطائرة اللي طارت فيها هاي فلاي الى القطب الجنوبي لأول مرة. والآن أضافوا فيها شعار جلوبال وبيشغلوا رحلات لهم ولكن على اي أساس !!
طيران جلوبال واحد من أغرب شركات الطيران الجدية بنموذج عمل مختلف وصعب. تشغيل طائرات عملاقة مثل الـ380 بين اوروبا وامريكا !! الآن هل غيرو نموذج عملهم بعد بداية صعبة لهم وتوقف طائرتهم الوحيدة بعد اربع رحلات فقط لصيانة ثقيلة مجدولة ؟
مجال الطيران صعب ومو أي حد يقدر يفتح ويدير شركة طيران. تحتاج تضمن أغلب العوامل المساعدة عشان ما تغادر بدري. الواضح ان طيران جلوبال يحاولوا إنقاذ نموذجهم بالتعديل عليه في بعض الجوانب !
الرئيس التنفيذي لطيران جلوبال واثق من استكمال عملهم ونجاحهم ولكن ننتظر كيف بيتم تشغيل هذه الطائرة اللي فاجؤا الجميع فيها !