اختيار أكاديمية طيران مناسبة هو أول خطوة تسويها إذا كنت حاب تصير طيار. وهذه هي الخطوة الأولى فعلاً ولكن البعض يستهين فيها مع انها أهم خطوة وممكن تتغير أمور في مستقبلك في الطيران بسببها. والموضوع مو موضوع سعر وموقع وخلاص! لا يا عزيزي في أمور وتفاصيل كثيرة لازم تعرفها وتركز عليها ممكن تغير تجربتك بالكامل.
وممكن ما تصدقوني اذا قلت لكم انه تواصلو معي طلاب طيران صارت معاهم بعض المشاكل اللي سببت تأخير تخرجهم لسنين والسبب الرئيسي كان أنهم ما تأكدو من هذه الجوانب من البداية قبل اختيار أكاديمية طيران . عشان كذا، في هذا المقال بتكلم معاكم كأخ وصديق وبعطيكم 8 جوانب مهمة لازم تعرفوها وتتأكدوا منها قبل لا تسجلو في أكاديمية طيران. اذا تأكدتم منها راح توفر لكم وقت وجهد ومال وصداع.
1. موقع الأكاديمية والطقس فيها :
اختيار الموقع مو بس جغرافي، هو قرار تدريبي. ترا الطقس يلعب دور كبير في تدريبك للطيران، لأنك تحتاج تطير كثير عشان تكمل ساعات التدريب على الطيران. ف لازم اتأكد ان الطقس في منطقة الأكاديمية مناسب للطيران اغلب ايام السنة.
الأماكن اللي فيها أمطار، ضباب، أو رياح شديدة راح تعطل جدولك ويطول الموضوع لحد ما تكمل ساعات الطيران اللازمة في التدريب. لأنه كل شوي بيصير تأجيل لطيرانك وممكن ما تطير خلال الأسبوع ابداً أو ممكن مرة واحدة بس.
2. شراكات الأكاديمية مع شركات الطيران :
بعض أكاديميات الطيران عندهم شراكة مع شركات طيران وهذا شي ممتاز لأنه أولاً يعطيك فكرة ان الأكاديمية موثوقة لأن شركات الطيران ما تسوي شراكه مع اي أكاديمية. اذا عندهم شراكة مع شركة طيران بيضيف لك فرص تدريبية وتوظيفية اكثر بعد التخرج.
طيب مستر طيران .. كيف أعرف هذا الشي؟ تسألهم مباشرة هل عندكم شراكة مع اي شركة طيران؟ وإذا عندكم هل في طلاب استفادوا من قبل واتوظفو مع شركة الطيران هذه أو شي من هذا القبيل؟
3. التكاليف الكاملة والخفية:
واحد من أهم أهم أهم الأمور قبل اختيار أكاديمية طيران .. لاحظ إني كتبت كلمة “أهم” ثلاث مرات. هذا مو غلط مطبعي! هذا فعلا تنبيه لأهمية الموضوع. والمقصد هنا عزيزي ان لازم تتأكد من تكاليف الدراسة الكاملة من أول خطوة وحتى التخرج مع التأكد من أي تكاليف خفية.
شو المقصود بالتكاليف الخفية؟ مثلا واحدة من الخدمات ما تكون مدرجة من البداية في السعر ولما توصل عندهم يقولوا لك لازم تدفع للخدمة الفلانية. وانت تتفاجأ وتفكر انها من ضمن المبلغ الكامل .. ويبدأ الصداع!!
يسألوني دائماً “كم تكلف دراسة الطيران” لكن الأهم مو الرقم الأهم تركز بالتفاصيل كلها:
- هل السعر يشمل كل شي؟ السكن والفحوصات واي اوراق لازمة؟
- هل في رسوم اضافية لساعات الطيران الزائدة او اي خدمات أخرى؟
- هل الإمتحانات كلها مدفوعة؟
- هل في أقساط أو تمويل؟ او لازم ادفع كل المبلغ دفعه كاملة؟
اطلب عرض كامل مكتوب من الاكاديمية مكتوب فيه كل التفاصيل وراجع البنود كويس!
4. أنواع الرخص والشهادات :
لا تسجل في أكاديمية قبل ما تعرف شو الرخص اللي بتحصلها؟ ومن وين؟ وهل معترف فيها؟. بالعادة الرخص اللي توفرها أكاديميات الطيران هي:
- رخصة PPL: رخصة طيار خاص
- رخصة CPL : رخصة طيار تجاري
- IR : الطيران بإستخدام الأجهزة
- ATPL : رخصة طيرا نقل جوي
- TR : ترخيص قيادة نوع طائرة محدد
وغيرها من الرخص والإعتمادات اللي ممكن ما تكون كلها موجودة في الأكاديمية وما بتحصل عليها كلها. وأيضاً اتاكد من الجهة اللي راح تصدر منها رخصتي مثلا EASA (أوروبا) او FAA (أمريكا) عشان اعرف هل معتمدة في المكان اللي حاب اشتغل فيه بعدين او لا. ولكن هالجهتين معتدمة في اغلب دول العالم.
5. كم عمر الأكاديمية؟
أكاديمية طيران لها سنة سنتين تفرق عن أكاديمية صارلها عشر سنوات. الأكاديمية اللي لها سنين في المجال يعني ان علاقاتههم أوسع ، نظامهم الإداري واضح ، مدربينهم محترفين ، والأهم أن وضعهم المالي مستقر.
الأكاديمية الجديدة ممكن ما تكون مستقرة مالياً وتصير عندهم خسائر ويضطروا يسكروا الأكاديمية وانت ما زلت في نص الدراسة والتدريب. وفعلاً صارت في أكثر من بلد والضحية هم الطلاب طبعاً.
6. عدد المدربين مقابل عدد الطلاب :
يعني بإختصار تتأكد منهم وتسألهم ياجماعة الخير كم مدرب عندكم ؟ وكم طالب حالياً محتاجين تدريب على الطيران؟ لأن كل ما قل عدد الطلاب لكل مدرب ، زادت جودة التدريب.
بعض الاكاديميات ممكن يوفروا في هذا الجانب ويقللوا عدد المدربين ولكن هذا يعني تأخير في التدريب وممكن ما تحصل وقت كافي تطير خلال الأسبوع. ولو حصلت ما يكون المدرب معطيك كل الجودة في التدريب لأن وراه طلاب غيرك منتظرين طابور !!
تأكد من المدربين وخبراتهم ومؤهلاتهم. وهل هم بدوام كامل مع الأكاديمية أو مجرد دوام جزئي.
7. عدد الطائرات ، أنواعها ، وصيانتها :
عدد الطائرات لازم يكون كافي مقارنة بعدد الطلاب .. يعني ما ينفع أكاديمية عندها طائرتين وتستقبل طلاب بدون حد معين. المفروض بالعادة أقل شي يكون عندهم 8 طائرات وأكثر.
ولأن السلامة اهم شي في الطيران ، لازم تتأكد ايضا انهم يسوولها صيانة دائمة وحالة الطائرات ممتازة وما تكون دائما متعطل فيها شي وموقفة للصيانة . لأن هذا يعني تأخير في التدريب وراح تقعد منتظر متى تطير مره اخرى.
إسأل الأكاديمية كم طائرة عندك؟ وكم عمرها؟ وشو نوعها؟ أحادية أو ثنائية المحرك؟ في أكاديميات عندهم النوعين ف تتخرج وانت مرخص على النوعين.
8. المسافة بين السكن والمطار؟
المسافة بين سكن الطلاب ومكان الأكاديمية او المطار مهمة . لأن اذا كانت هذه المسافة بعيدة ، راح تضطر يومياً لقطع هذه المسافة رايح جاي. ف الأفضل اذا كان السكن قريب جداً أو في نفس المكان.
وإذا كان بعيد نوعاً ما واحتاج استخدم المواصلات العامة هل يوفروا هذا الشيء او يكون مسؤولية الطالب؟
نصائح اختيار أكاديمية طيران
- أنصحك بزيارة الأكاديمية اللي ناوي تسجل فيها وتشوف كل شيء بعينك. حتى وان كانت في مدينة ثانية أو دولة ثانية. سافر لهم وشوف كل شي بعينك وقابلهم وتكلم معهم. دراسة الطيران مكلفة وتستاهل هذا الشي قبل التسجيل. وتوفر عليك الصداع والمشاكل لاحقاً
- قابل طلاب الأكاديمية القدامى واسألهم على كل التفاصيل. او تواصل معهم عن بعد واسأل التفاصيل الغير واضحة لك. جميل انك تسمع من وجهة نظر طالب جربهم قبلك.
- اختيار الأكاديمية المناسبة يكون حسب خطتك لما بعد التخرج. لا تقول “خلني ادرس هنا وبعدين يصير خير”. لازم تكون عارف وين بتروح وشو بتسوي بعد التخرج من هذه الأكاديمية.
- اذا كنت مهتم مو بس بموضوع اختيار أكاديمية طيران ولكن بمدراسة الطيران بشكل عام تقدر تشوف الحلقة الكاملة اللي سويتها وشرحت كل الخطوات من بداية الدراسة الى الوصول لشركات الطيران العالمية.
الخلاصة :
اختيار أكاديمية طيران مو قرار سهل ، قبل ما تدفع او تسجل حاول تتأكد من جوانب هامة بتوفر عليك جهد ووقت ومال وصداع مستقبلاً. الجوانب هي موقع الاكاديمية وشراكاتها، والتكاليف الكاملة والخفية، نوع الرخص والشهادات، عدد الطائرات والمدربين، وتاريخ الأكاديمية واستقرارها.
خذ وقتك في البحث واسأل أكثر من أكاديمية .. وقارن براحتك. ومن الأفضل تزورهم بنفسك وتشوف كل شي بعينك. وتذكر ان الرحلة ما تبدأ من السماء .. ولكن تبدأ من قرار ذكي على الأرض.